Veröffentlicht: 10.01.2024. Rubrik: Unsortiert
Da Oithea (Mundart-Fassung)
Da Oithea
Bei ins dausd, in da Au, do gibs 3 Kategorien, vo Hawara. In Jungan, des is da Bua, in Oidn, des is da Voda vom Buam, und wenst in a gwisses Eta kimst, nohand kos sei, dass di de Leit, iwahaupt glei an Oithean hoassn. Natialich, gibs in so ana Hierachie don a a boa Regeln, de koana nidagschrim hod, zum Beispü, wenns ums Grindsticki ge dadat, wei oana vo de Bauan moand, dasa ebba do a boa Meta mea z´gültig mochn hedat, jo nohand kos scho sei, das nid da Jung´, a nid da Oit´, sondan da gonz da Oit´am Obend an sei Tia pumpat, damida eam sog, wos Sache is. Nid sötn hoasts don "jiaz wead ebba eha do, da Baua eam seym kema, um de Soch z´bereinigen", und so is noahand a, meistns.
Eascht z´letzt hods bei ins wida so an Foi gem, es woa nämlich aso, dass in Pichla sei jingana Bua im Wiatsheisl gmoand hod, das dea Zaun uman Gruawa sei Feidl, jo eh mea a Akt der Gnade wa, und dass den, wenns in Oidn don amoi neama gib, a neama gem dadat. Jiaz woas a so, das da Seidl Erich, seinaseits da Postla vo insam schenen Deafi und a guada Freind vom Gruawa seina Sippschoft, seyg kead und no am gleichn Obend deanan vazeyd hod. Do kost da natialich vuastön, dass in Gruawa seina Stum, muats zuagong is. Und wias hoid nohand aso is, do bei ins, hoda si sein Janka ogleg, und si aufn Weg gmocht, da Oitherr.
"Tm Tm Tm", hods 3 moi anan Pichla seina Tia grumpit. "Wea wead oft des jiaz no sei Hons?", hodn sei Oide a wengai ungleibig gfrog. In jingan Buam hingeng, is scho a wengai schlecht woan, in da Monggegend. "Papa", hoda gsog, "du Papa, I glaub es is gscheida, du mochst nid auf"
Da Oide hodn ogschaud und gfrog "Spinnst jiaz Reini, I mua awoi wissn, wea si zu dera unheilign Zeit no auf meim Hob und Guat umanondatreib", don isa aufgstondn, zua Tia hi gong, und hods aufgmocht.
Vua eam gstondn is nohand des oide Mannei. "Jo Gruawa, wos treib di do hea?", woit da Pichla wissn. S´Oide Mannei hod eam direkt in de Aung gschaud und gmoand "Oana vo deine Buam." Daraufhi, hod si da Pichla widarum, umdrat und in Reine ogschaud, wobeia seine Aungbraun aufizochn hod. "Don kimst hoid eina".
Wias don am Tisch gsessn san, ollemidanonda, hod da Gruawa es Wort ergriffen und ogfong, zum ren.
"I bi jiaz 80 Jo, und in dia 80 Jo, do hod scho so moncha vasuacht, seine Schindluada z´treim mid mia, owa i sog eng oans, mid mia nid. Wen I heid aufdnocht ins Bett grei und meine Aung zua moch, don kunts passian, dass is, wen de Sunn wida aufged, neama aufgriag und wen I nid woas, das mei Lond in de Hent vo meim Buam iwageyd, nohand find I koa Rua, a nid, unta da eadn. Und soits jiaza a so sei, das iagendwea aus dera Runde auf de Idee kammat, ob eam nid doch a Feidl mea zuastehad, und si üwa Vaträg hinweg setzn wü, de untaschrim woan san, bevoas den Kasperl iwahaupt gem hod, jo nohand muaß i eich song, don wead I wida do hea kumma und eich dron erinnern."
Da oide Pichla hod am Gsichtsausdruck vom Reini scho grissn um wos dass ged. Sei Frau, merawei a Nervöse, hod zidat und hod in Gruawa don a weng unbehoifn gfrog, oba nid wos trinkn wü. "Donksche", hoda gsog, da Gruwa, und is gong.
An Tog spada, do hod si don da Reini zompockt und is owamois ins Wiatsheisl eini, damita de Soch wida grod ruckn ko, owa nid schlecht gstaunt hoda, wira in Pforra otroffn hod. "Jo Leit wos is oamoi los, is wea gstoam?" hoda in de Runde gfrog und no a wengai deppat glocht dabei. "Jo", hod oana ausm hintastn Eck kund gem. Do is gsessn, in Gruawa sei Enki. "Wea?", hods in Reini grissn. "In Oithean hods dawischt". Do hods in Reini an Stich ins Herz eine gem. "Won?" "Gestan, Zmittog." "Z´Mittog? Seyg ko nid sei". D´Leit homdn ogschaud. Wosa damit moand, homsn gfrog. "S´Mannei woa gestan no bei ins, wengam Feidl." "Won?" "Jo Aufdnocht, wos woas I, 7e weads scho gwen sei, drum woas I jo das des nid gem ko", hod da Reini eana eaklead.
Seithea, homs bei ins, nix mea, iwas Feidl vom Gruawa gret.
